aran XXI

ENQUÈSTA SUS PARTICIPACION POLITICA

publicat per Aran XXI eth 11:09 0 comentaris

Planvolut Joan Ramon

En aunor ara vertat auem de díder que mos a plan susprenut era sua reaccion deuant d’Aran XXI. Sincèrament, non entenem aguesta desconfidança ne tanpòc es sues contradiccions.

Resulte curiós observar coma, dempús de lèu un an d’activitat “bloggera” d’AranXXI, era sua responsa envèrs eth nòste collectiu, mès enlà d’un brèu comentari un temps a, age estat pr’amor dera publicacion d’un post en blog deth nòste companh Paco Boya.

Òc, companh. Non tutor, ne pairin, ne lidèr, ne tanpòc mecenes. Un companh mès d’entre toti nosati.

Aguesta sua reaccion mos è a sospitar (ara mos pòt acusar de maupensadi) d’ua pòc nòbla intencion de hèr virar er aigua entath sòn costat.

En sòn post deth 30 de gèr mos acuse d’irresponsables, de camuflar-mos jos non sabem ce qué e de bèra “lindesa” mès, entre d’autes rasons, per non signar es nòsti articles. Ebé Joan Ramon! Qu’eth Cap de Comunicacion d’ua Institucion coma eth Conselh Generau d’Aran sigue tant mancat d’informacion…aquerò òc que vò díder que quauquarren non marche.

E en veir que se trape tant mau informat, desencusarà que mos prenegam era confidança de meter-lo ath dia: es nòms e cognòms de toti es membres d’AranXXI sigueren publicadi en sòn moment en nº 11 deth huelheton Vediau, quan eth collectiu se presentèc.

Totun dilhèu bèra ment pervèrsa poirie pensar que non signam pr’amor que non auem de besonh era qüòta de protagonisme que d’auti tanplan demoren. E, de vertat, mos agradarie que balhèsse es nòms d’aqueri casi emblematics des que parle en sòn post, aqueri que son ena administracion damb bèra responsabilitat e, ath viatge, en AranXXI, pr’amor qu’enquiath moment er unic que trabalhe e a un carge public de confidança ena administracion ei vosté.

Mès en quauquarren èm d’acòrd: tanplan i auesse mès “plataformes”, coma vosté mos nomente, coma AranXXI. Aguest serie un bon signe de qu’en nòste país es causes son en trèn de cambiar e de qu’ei possible expressar era opinion, se sigue joen o non, sense que bèth un se n’aprofite entà alugar eth sang e crispar es consciéncies.

E ja entà acabar, nosati èm joeni, òc, e tanben èm conseqüents e coerents Sr. Colomines, e se tanben a arrason en qu’ena vida es causes pòden arribar a èster un vòl de coloms (era autocritica tostemp ei rasonabla) non ei cap aquera era nòsta intencion, se non que volem contribusir a generar un debat sus eth nòste país que sigue fructifèr, e s’ath madeish temps tanben li balham estenuda entà qu’amplisque eth sòn diari, donques qué i haram! Totun l’emplaçam a qu’ac compròbe per vosté madeish, Aran XXI ei un collectiu dubèrt pr’amor que nosati tanben “passam jòc a toti”.

publicat per Aran XXI eth 00:31 0 comentaris