5.12.06

Eth camin dera cooperacion

Descontentament, apolitisme e me temi que sustot indiferéncia neurissen eth mistèri dera Abstencion. Mès interpretar era Abstencion ei coma sajar de cercar es claus ontologiques dera Santíssima Trinitat. En ues eleccions, qu'an volut díder es que non an volut díder arren?
Sonque pogui díder qu'er hèt de participar en un procès d'eleccion democratic supòse un compromís ciutadan de prumèr nivèu, que non ei çò de madeish votar dreta que quèrra o que demorar impassible ara calor deth larèr, que, en fin, auem de besonh era politica democratica, e que çò qu'ei en crisi non ei era politica senon ua manèra determinada de hèr politica: era que s'exercís de forma autoritària, centralizada e jerarquizada.
Dilhèu era classa politica a de començar a pensar naues formes de govèrn en un contèxte de granes henerècles sociaus e màgers interdependéncies. Eth principi de cooperacion pòt èster un bon procediment tà gésser deth clòt. Cooperar vò díder despartir es responsabilitats e priorizar es procediments formaus e informaus (dialòg e participacion ciutadana) peth dessús des estructures tradicionaus de podèr.
Quauqua mòstra d'autocritica de quauque dirigent politic pòt daurir camin en aguest sens. A veir...

publicat per Aran XXI eth 10:34