aran XXI

Pensi qu'eth desencant dera societat en çò que tòque ara politica non ei ua causa dera Val, se non qu'aparentament passe per tot, dera madeisha manèra qu'era politica destructiva de que se parle, ja hè ans que se practique. Çò que non è tan clar ei s'açò ei çò que passe o ei era manèra coma se reflèxen es campanhes enes mieis de comunicacion (era sang se ven ben).

En çò que tòque ar Estatut, era actitut de " o tot o arren" non me semble guaire madura,e francament non i veigui eth conformisme per enlòc. Aran e Catalonha an artenhut mens de çò qu’an demanat, mès an hèt un pas tà dauant e an daurit era pòrta a futures negociacions. Era melhora ei evidenta, non?

Se comente qu'ena Val era gent sonque sent era politica sua ce se hè des d'Aran. Òc, ei cèrt, mès ja digui que creigui qu'açò passe per tot, era gent ei desencantada damb era politica, mès ara ora de decidir sus tèmes mès pròpèrs i a mès compromís e mès participacion, digam que "pera part que mos tòque".

Era realitat sociau d'Euròpa e des sues ciutats cambie plan, e fòrça rapid. Es termières despareishen, cultures de tot eth mon an d'apréner a convíuer amassa, e es politiques extèrnes arriben mès luenh que jamès. Açò, en un principi, pòt hèr pòur, mès jo ac voi veir mès coma un hèt enriquidor, e coma ua oportunitat de conéisher e hèr-se a conéisher. Per açò pensi qu'er hèt qu'UA collabòre damb eth PSC ei ua oportunitat unica de hèr arribar era politica aranesa mès enlà dera Val. Non creigui qu'era identitat aranesa deth partit sigue miaçada, e per contra i a un deputat aranés en Parlament de Catalonha, sonque per açò ja vau era pena!!!